जोपासना पर्व

घर, परिसर आणि शाळा... मिळून समाज सारे आपण
शिकवता येतं नव्या जीवाला; अशीच आपली शिकवण

'मातीचा गोळा' किंवा 'कोरी पाटी' समजून उदाहरण
घडवता येतं नवागताला; असंच आखतो धोरण

खरंच कां असं घोकून, आखून शिकवता... घडवता येतं?
खरं तर मूलच आपल्याकडून शिकत... घडत असतं

ते असतं स्वयंप्रज्ञ; मूलत: निराळं, एकमेव जगावेगळं
ते आपलं असलं तरी, त्याचं असतं आभाळ आगळं

ते असतं या सृष्टीतील एक नवनिर्मिक, अज्ञाताचा उद् गार
तेच नवा इतिहास घडवतं; फक्त हवा जोपासना संस्कार

त्याच्या विचारांतूनच घडतं व्यक्तिमत्त्व आणि स्वप्न मनासारखं
त्याला फक्त हवं असतं... प्रेम, विश्वास आणि घर घरासारखं

आपण असतो केवळ जन्म-मार्गदाता, नसतो भाग्यविधाता
तेच असतं स्वत:च्या आयुष्याचा... भविष्याचा कर्ता-करविता

- प्रा. विजय जामसंडेकर